يا شعب مصر اللى سابقة ضحكته غضبه
ما يطلع الصبح إلا وصحبتك سببه
يا مخلص الأرض من وحشتها فى الأكوان
يا حجة الشمس تفضل طالعة ساعة كمان
مستأذنة وهى مش عادتها الاستئذان
متونسة بالميدان وبعشرته ونسبه

يا شعب يا مصلي قدام العساكر صف

يجري الجريح من ورا لقدام

لا خاف ولا خف

تدوس عليه العربية تحوله لميت الف

يا للعجب يقتلوه ويتوقعوا هربه

يا للعجب يقتلوه ويتوقعوا غيابه

اللي اتقتل لسه واقف هو واصحابه

ما بهدل الامن غير من ماتوا واتصابوا

والصبح ما نور الا اما الشموس غربوا

اضرب عليا انا مش جاري يا قناص

من امتى خوفنا يابن الكلب ضرب رصاص

كل اللي شاف الشهيد بقى تاره تاره الخاص

الدم صاحي وعنيد ولا تقبلوش تربه

يا شعب ياللي دفع تمن الشوارع دم

احفظ اسامي اللي ماتوا في الشوارع صم

الشارع اللي اصطفى وقصر الامارة لم

ملوك قليلة الرباية ركبوا واتركبوا

شعب بغزالة اتخنق قلب التاريخ في يومين

لابس عباية جحا وهو صلاح الدين

بيكرم الانبيا ويهزأ السلاطين

والفجر خيله وحبات الرمال عربه

يا شعب مصر اكم فرعون وفرعونة

ضربتهم ضرب سجادة في بلكونة

ضرب الملوك تربية صالحة ومضمونة

ما يبقوا بني ادمين الا اذا اضربوا

ضرب الملوك مصلحة

ضرب الملوك تأديب

محلى المماليك وهي بتجري في السراديب

ولولا ضرب شجرة الدر بالقباقيب

مابين اغا وباش اغا كان التتار غلبوا

بعدين مبارك سادات فاروق ماحدش دام

هو احنا شعب كده ما بيعيشلناش حكام

عقبال جيرانا وحبايبنا كمان يا سلام

لو كل من له رئيس نصحى نلاقيه قلبه

يا مصر لسه ولسه الثورة بلة ريق

ما ينتهيلك طريق الا ويبدا طريق

يا شعب مصر تعالى نتفق يا شقيق

رج الملك قبل ما تنعم عليه بلقبه

رجه كده شوفه ان كان الملك شغال

واسأل عليه المكوجي واسأل عليه البقال

واهم حاجة في صفاته انه يكون يتشال

متربي عال لما يمشي يلتزم ادبه

بتكون في احسن حالاتك وانت مش محكوم

بتبقى رايق ولا ظالم ولا مظلوم

بعدين ده ايه الغبي ده اللي يهددك بالشوم

يا مخلي الف احتلال ينزل على ركبه

يا شعب انت اللي كارم كل من حكمك

الدولة دي عارفة تحكم بس من كرمك

كشر لها وهي حتجيلك تبوس قدمك

مافيش حاجة اسمها مليون راجل اتغصبوا

سايق عليك النبي ما تقول كفاية يا شيخ

الملحمة لما تخلص يبدأ التاريخ

وبكرة جاية حروب فيها بكا وصريخ

وبكرة نصرك يخض الشمس من لهبه

سايق عليك النبي ما تقول كفاية كده

من النهاردة انتصاراتك حتبقى كده

يا شعب مصر اللي رجالته وبناته كده

حلال عليه لبن العصفورة لو طلبه

سايق عليك النبي ما تقول كده كفاية

إفرح وكمل وما تقولشى كده كفاية
الثورة دى بداية زى الهجرة والميلاد
الثورة دى بسملة كمل بقى الآية